2024-жылдын 5-июнунда Каракол шаарында Ысык-Көл облусу боюнча Регионалдык инвестициялык кеңештин (РИК) командасынын БУУнун Өнүктүрүү программасынын (ПРООН) Кыргыз Республикасындагы Туруктуу өкүлү Александра Соловьёва менен тааныштыруу жолугушуусу болуп өттү.

Жолугушуунун алкагында РИКтин катчылыгынын командасы тааныштырылды:
— Мирлан Сабыров — катчылыктын жетекчиси,
— Айгерим Нурбекова — МЖӨ жана экономикалык маселелер боюнча адис,
— Тимур Жумабеков — укуктук маселелер боюнча эксперт.

Команда региондун туруктуу өнүгүүсүнө багытталган негизги максаттар жана пландар менен бөлүштү. Айрыкча көңүл жергиликтүү мамлекеттик органдар, ишкерлер ассоциациялары, жарандык институттар жана эл аралык уюмдар менен өнөктөштүктү бекемдөөгө бурулду.

РИКтин катчылыгы өз ара диалогго, чечим издөө жана демилгелерди илгерилетүүгө ачык жана натыйжалуу платформа катары сунушталды. Жолугушууда жергиликтүү ишкерлер менен жолугушууларды өткөрүү мүмкүндүгү талкууланды. Алардын алкагында төмөнкү максаттар каралууда:
• ишкер чөйрөдөгү негизги көйгөйлөрдү аныктоо;
• бизнести мамлекеттик-жеке өнөктөштүк (МЖӨ) долбоорлоруна тартуу мүмкүнчүлүгүн баалоо;
• чакан МЖӨ долбоорлорунун даяр идеяларын тандап алуу жана аларды катчылык аркылуу коштоо;
• системалык мүнөздөгү маселелерди чогултуу жана Кеңештин алдыдагы жыйынынын күн тартибине чыгаруу.

Мындан тышкары, ишкерлерге укуктук колдоо көрсөтүү темасы көтөрүлдү — өзгөчө көңүл чакан жана орто бизнести юридикалык консультациялар менен камсыздоону кеңейтүүгө бурулду.

Жолугушууда приоритеттүү багыттар катары төмөнкү темалар белгиленди:
• жаштар ишкердигин колдоо,
• коомдук кеңештердин активдүүлүгүн жогорулатуу,
• жашыл экономика алкагында жашыл демилгелерди жана туруктуу чечимдерди илгерилетүү.

РИК катчылыктарынын ишке кириши — Кыргыз Республикасынын Министрлер кабинетине караштуу Инвестициялык кеңештин катчылыгы, БУУӨП жана Улуттук инвестиция агенттигине караштуу МЖӨ борборунун ортосунда түзүлгөн үч тараптуу кызматташтык келишиминин алкагында жүзөгө ашырылууда.