Нарын облусунда Регионалдык инвестициялык кеңештин (РИК) катчылыгы расмий түрдө ишин баштады. Бул — ишкерликти колдоо системасын бекемдөөгө жана аймактагы инвестициялык климатты жакшыртууга багытталган маанилүү кадам.

Катчылыктын курамы Кыргыз Республикасынын Президентинин Нарын облусундагы ыйгарым укуктуу өкүлү Алтынбек Калдарович Эргешовго тааныштырылды. Катчылыктын командасын Кыргыз Республикасынын Министрлер кабинетине караштуу Инвестициялык кеңештин катчылыгынын жетекчиси Улук Кыдырбаев сунуштады. Нарындагы РИКтин жаңы катчылыгын Илияз Усенов жетектейт.

Аймактык катчылыктарды түзүү — мамлекеттик жана жеке секторлор ортосундагы диалогду системдүү жана натыйжалуу кылуу максатын көздөйт. Эми жергиликтүү ишкерлер түздөн-түз кайрылып, кеңеш жана колдоо алып, өз демилгелерин илгерилетип, өнөктөштөрдү табууга жана инвестициялык же ГЧП долбоорлорун коштоого мүмкүндүк алышат.

Нарын облусунун инвестициялык мүмкүнчүлүктөрү кеңири, өзгөчө төмөнкү тармактарда:

• экологиялык жактан таза айыл чарба жана мал чарбачылыгы,
• ички туризм жана агротуризмди өнүктүрүү,
• жеринде кайра иштетүү ишканалары,
• жаңылануучу энергия булактары,
• чек ара соодасы жана аймактык кызматташтык.

Нарындагы РИКтин катчылыгы — ишкерлер менен ыкчам байланыш пункту гана эмес, эксперттик борбор да болот. Бул жерде каржылоого байланыштуу, укуктук, салыктык, ГЧП жана экспорт маселелери боюнча адистештирилген жардам көрсөтүлөт.

Бул демилге Кыргыз Республикасынын Министрлер кабинетине караштуу Инвестициялык кеңештин катчылыгы, БУУнун өнүктүрүү программасы (ПРООН) жана Улуттук инвестиция агенттигине караштуу МЖӨ борбору менен түзүлгөн үч тараптуу келишимдин алкагында ишке ашырылууда.