Кыргызча
English 
Русский 
2024-жылдын 30-ноябрында Бишкек шаарында «Майыптыгы бар адамдарды инклюзивдүү жумуш менен камсыздоо» форуму болуп өттү. Бул иш-чара Кыргыз Республикасынын Эмгек, социалдык камсыздоо жана миграция министрлиги тарабынан БУУнун Өнүктүрүү программасы (ПРООН) менен биргеликте жана башка эл аралык өнөктөштөрдүн колдоосу менен уюштурулду.
Форумдун жүрүшүндө өзгөчө муктаждыктары бар адамдарды жумуш менен камсыз кылуу жана алардын коомго интеграциялануу маселелери талкууланып, алардын ийгиликтүү ишке орношуу шарттары жана кесиптик өнүгүүсүнө басым жасалды. Форумга мамлекеттик органдардын, эл аралык уюмдардын, коомдук фонддордун жана бизнес-ассоциациялардын өкүлдөрү катышып, инклюзивдүү коомду түзүүгө багытталган ийгиликтүү мисалдар жана мыкты тажрыйбалар каралды.
Форумдун алкагында «Майыптыгы бар адамдарды жумушка орноштуруу» аттуу жетекчилик сунушталды. Бул колдонмо жумуш берүүчүлөргө өзгөчө муктаждыктары бар адамдарды жумушка орноштурууга зарыл болгон шарттар боюнча практикалык маалымат берет.
Кыргыз Республикасынын Министрлер кабинетине караштуу Инвестициялык кеңештин катчылыгы өзгөчө муктаждыктары бар адамдардын жумуш менен камсыз болуу жана кесиптик өнүгүү мүмкүнчүлүктөрүн кеңейтүүгө багытталган ушундай демилгелерди колдойт. Биз өнөктөштөрүбүздү жана жеке секторду коомдук фонддор жана уюмдар менен активдүү иштешүүгө, алардын продуктылары жана кызматтарын колдоого, ошондой эле биргелешкен долбоорлорду ишке ашырууга чакырабыз.
Биз коомдун бардык мүчөлөрү, алардын физикалык мүмкүнчүлүктөрүнө карабастан, өлкөнүн өнүгүшүнө салым кошо аларына ишенебиз.